Wikipedia:UIL Existanti

«	Supru a UIL kontenaje Angli versione de disi chapitre	»
Antei: Non-savo de stranji lingues		Sekuenti: Latinum?

Un existanti lingue?

Tre multi homes sal halta dislok e dikte: yes, nus granta ke vud es desirindi have un singli lingue usat omnilok, ma ob non vud es maxim bonim selekte un ek li existanti lingues e usa tu in omni komunikationes inter du o plu multi nationes, even si nule ek tes konsernat vud sava ti lingue kom sen propri patrial lingue? Li respondo es ke deliberati selekto de irgi soli lingue por tali intentione vud rekontra non-venkabli desfasilesos pro international jalusesos. Franses e germanes ambi vud kombata ferosim konter propositione por fa anglum universalim rekogniti international lingue, franses e angles konter germanum e set. – e totim naturalim anke, den tali selekto vud signifika enormi handikapo de omni altri nationes. E non vud es posibli forsa omni nationes konkorda pri li selektione de lingue de plu mikri natione: fantastes ha, faktim, proposi norvegum e armenum! Vud besona multi forse por forsa homes omnilok in li monde a komensa li studio de un o altri ek disi lingues, e por natione dunke positi en li lingualim maxim favorati positione vud es dutabli benefise a vida lun amati lingue mutilati e pede-fulati omnilok, kom vud nonevitabli es li resulte.

Ye un die, kand me diskused disi aferes kun famosi belgi historiiste e plendad pri li desfasileso sentiti da homos de sientie kel chansad naska in mikri lande, lo dikted: Insted skripte in artifisial lingue, vud es multi plu bon por vus danes a skripte fransim; si li materie es sat bon, nus sal lekte lu voluntim, even se lu vud es mali fransum. Me respondad ke nule pove evita es kelkigrad iritati kand lektent sen propri lingue damajati da gramatikal e frasal kulpes, e ke por dane vud es multim plu fasil parlerna skripte ido (o nun novial) kam lerna skripte even tre kulposi fransum; lo vud evita ti non-plesanti sentio de inferioreso kel le mus sempre senti kand le proba skripte seriosi libre o papere in stranjeri national lingue.